ضحكوا عليكي و سرقوا جمالك,,,ظلموا ولادك خنقوا عيالك
بقى بالذمة عاجبك حالك,,,ولا باكية عليه
هامسح دمعك هأقف جنبك,,,فعلا تمرت تربية إبنك
واللي يوم هايمص في دمك,,,مش هنسكت ليه
قتلوا أخويا سجنوا أبويا,,,قالوا عليا قضية بانجو
يمكن أهرب منك أنجو,,,لكن لأ هيهات
هافضل أشيل همك على كتفي,,,هافضل شايلك جوه في قلبي
هافضل أحبك موت يا بلدي,,,لحد ما أبقى رفات
قالوا الشرطة في خدمة شعبك,,,أيوه ما فعلا عذبوا أبنك
حطموا وجهه كسروا عضمك,,,خبطوا دماغه في الحيط
قالوا ده مجرم يعني وصاية,,,لفقوا ليه ياما قضايا
و إحنا نصدق إيه يا ضنايا,,,هو الشعب عبيط
هانوا ولادك بإلفاظ سافلة,,,و اللي يعارض عملوله حفلة
و إنتي يا بلدي عايشة في غفلة,,,ما عدش فيكي أمان
فيكي يا بلدي بس طوارئ,,,حبسوا بيها عمرو و طارق
و لا فيهم قاتل و لا فيهم سارق,,,دول شباب فكسان
قال إيه طالبوا بالتغيير,,,عايزين بلدي يبقى جميل
قالوا نظامنا هد الحيل,,,خلى أخرنا ضياع
وقفوا بعلو الصوت قالوا لأ,,,قالوا بلدنا محتاج زقة
و اللي يا عيني منهم أتبقى,,,كام ضافر و صباع
طب ليه نسكت على أفعالهم,,,لازم حبة يلموا كلابهم
لازم يعرفوا إني رافضهم,,,علشان أنهض بيكي
أول واحد هيقول لآ,,,أول إيد هتصد البعدا
أول جثة في بحر الشهدا,,,ده أقل واجب ليكي
قتلوا أخويا سجنوا أبويا,,,قالوا عليا قضية بانجو
يمكن أهرب منك أنجو,,,لكن لأ هيهات
هافضل أشيل همك على كتفي,,,هافضل شايلك جوا في قلبي
هافضل أحبك موت يا بلدي,,, لحد ما ابقى رفات
